اکھ تے دل ایکو ای گھر دے
اک دوجے تے دویں مَردے
من اپنے نوں نال رلاندے
مل کے سارے موج مناندے
تینوں یار ایہہ یاری لاون
روح نوں اپنے نال ملاون
اَکھاں لبھن یار اک سوہنا
عیبوں پاک تے من نوں موہنا
لبھے یار تے نظر ملاون
پیار دے اوہ نوں ڈورے پاون
پاگل ہوون چاہ وچ اُس دی
وچھ وچھ جاون راہ وچ اُس دی
کردا پھرے دل صاف ستھرایا
دل دا مالک لیا بٹھایا
روح دے نال فیر میل کرایا
من موجی وی دوڑا آیا
دن خوشی دے پیار دیاں راتاں
روز ای عیداں روز شبراتاں
دنیا سب نوں روز لبھاوے
غلطیاں عیباں تے اکساوے
اکھ دی غلطی اوہ رُس جاوے
دل وچ میل تے اوہ اُٹھ جاوے
روح سُنے تے اوہ کرلاوے
من وی میرا روندا جاوے
رَل کے سب مناون اوہ نوں
موڑ موڑ لیاون اوہ نوں
اوہ دکھاوے بے پروائیاں
لکھاں ہور نیں اوہ دیاں جائیاں
جے چاہوے تے پا لَئے موڑا
نہ منے تے فیر وچھوڑا
اپنے آپ پچھتاون سارے
رَل کے نیر بہاون سارے
غلطیاں تے شرما جاون
سیدھی راہ تے آ جاون
اور سوہنا تے آ جاوے گا
فیر وی پھیرا پا جاوے گا
